Коронавирус инфекциясе белән авыручылар саны арткан

Соңгы атнада коронавирус инфекциясе белән авыру 1,5 тапкырга арткан, дип хәбәр итә Татарстан буенча Роспотребнадзор җитәкчесе урынбасары Любовь Авдонина. 18-24 ноябрьдә COVID-19ның 685 очрагы теркәлгән. Шул ук вакытта, Роспотребнадзор вәкиле билгеләп үткәнчә, коронавирус инфекциясе хәзерге вакытта дәвам итә торган кискен респиратор авырулар рәтенә керә. Еш кына авыруны ОРВИ формасында уза торган «омикрон» штаммы китереп чыгара. Авдонина билгеләп үткәнчә, төбәктәге эпидемиологик вәзгыять контрольдә тотыла, сәламәтлек саклау системасы штат режимында эшли.