Татарстанда яшәүче халыкларның телләрен саклау һәм үстерүгә юнәлдерелгән проектлар өчен грантлар тәкъдим итүгә гаризалар 27 мартка кадәр кабул ителәчәк. Бу хакта ТР Икътисад министрлыгының матбугат хезмәтеннән хәбәр иттеләр.

«ТР Икътисад министрлыгы Эшкуарларга ярдәм итү фонды аша коммерцияле булмаган оешмаларны «2014-2021 елларда Татарстан Республикасының дәүләт телләрен һәм Татарстан Республикасындагы башка телләрне саклау, өйрәнү һәм үстерү» дәүләт программасын гамәлгә ашыруга җәлеп итүдә булышлык күрсәтә», — диелә хәбәрдә.

Бәйгедә катнашу өчен республика территориясендә эшчәнлек алып бара торган иҗтимагый оешмалар чакырыла. Аларның эшчәнлек алып бару вакыты, конкурс игълан ителгән көннән алып, бер елдан да кимрәк булмаска тиеш.

Конкурс нәтиҗәләре буенча 5 җиңүче сайланачак, аларның һәркайсы 200 мең сум күләмендә ярдәм алачак.

Гаризалар түбәндәге адрес буенча кабул ителә: Казан, Кремль урамы, 9, 225нче бүлмә (милли мәгариф бүлеге, (843) 294-95-09, 294-95-10).